Item aengaen(de) den pansie(r) dat jan van quaderebbe eysschen(de) was/ willem(me) van doirne h(er)naschmake(r) dwelck de selve willem ind(er)/ stadt va(n) thiene(n) ontfange(n) soude hebbe(n) om te maken(e) dwelck/ jan seyde dat hem niet weder gelev(er)t en was d(air)op willem/ seyde dat vand(en) weerdy(n)nen inden pellicaen te thiene(n) ontfa(n)g(en)/ en(de) hue(r) oft e(n)nigen va(n) hue(re)n dochte(re)n die zij d(air)om gesonden/ hadde ov(er)gelev(er)t en(de) gerestitueert te hebben(e) d(air)aff de/ voirs(creven) jan contrarie c(er)tificacie(n) va(n) thiene(n) hadde gebracht/ en(de) oick hoe ten ande(re)n male jan te thiene(n) he(m) te rechte/ hadde gep(rese)nteert tege(n) willem(me) ten dage die p(ar)tien alh(ier)/ bijden borg(er)meest(er) beteekent was ald(air) te gaen(e) d(air)aff rechts/ plegen en(de) dat wille(m) d(air) niet en was geco(m)pareert Es/ geappointeert en(de) uuytgesproken bijden rade vand(er) stat nae/ dats hen p(ar)tien gekeert hebbe(n) va(n) dien totte(n) mi(n)lijcken/ appointeme(n)te vand(en) selve(n) rade dat de voirs(creven) wille(m) den/ voirs(creven) ja(n)ne voir tvoirs(creven) pansier en(de) coste(n) bij he(m) geleden/ betalen sal vijf r(inssche) g(ulden) te lx pl(a)c(ken) tstuck half te paessche(n)/ naestcomen(de) en(de) dander helcht tsintjansmesse d(air)nae q(uo)l(ibet) ass(ecutu)[m]/ In (con)s(ili)[o] op(idi) p(rese)ntibus ambobus burg(imagistr)[is] m(ar)cii ult(ima)