Van h(er) claese vanden borne prieste(r)/ It(em) uut dien dat h(er) claes vanden borne prieste(r) als p capellaen vand(er) missen/ die pet(er) wilen trudens geordineert heeft te doen ind(er) kerken van langdorp/ op sente pet(er)s altaer comen es voir den raede vand(er) stad van loeven(e) opdoende/ hoe aert trudens poirte(r) d(er) stad van loeven hem alrehande ongerief en(de) ongebruyc/ dade aen de goede die voir de voirs(creven) missen gelaten en(de) gheordineet sijn boven/ dien nochtan dat hij den voirs(creven) aerde om beters wille des voirs(creven) h(er) claes leef/ daghe langc gelaten heeft een schue(r) mette(n) hoefkene daer sij op steet op/ seker vueghe gelijc die bescreve(n) staen in ene(n) scepen(en) brieve van arschot die/ tusschen de voirs(creven) p(ar)tien daer af gemaect es en(de) desgelijx in een instrument dat/ de voirs(creven) h(er) claes voir den raede vand(er) stad thoende Op dwelc de voirs(creven) aert/ trudens alrehande verantw(er)den dede en(de) ond(er) den ande(re)n dat de voirs(creven) h(er) aert [claes] den/ voirs(creven) dienst soude hebben laten staen en(de) de goede ov(er)gegeve(n) mids den welken hij/ meynde dat tgheen des daer voe(r) toe gesciet es wa(r)e van gheenre werden/ sijn en soude Soe eest dat de raet vand(er) stat van loeven(e) get(er)mineert heeft/ voe(r) reden en(de) recht dat de voirs(creven) aert trudens sijn hande doen sal en(de) afdoen/ dongebruyc dat hij den voirs(creven) he(re)n claese inde voirs(creven) goede gedaen heeft uut/ genomen inde schue(re) mette(n) hoefken voirg(eruert) en(de) dat de voirs(creven) h(er) claes daer in/ blive(n) sal en(de) die peyslic gebruyken Maer eest alsoe dat de voirs(creven) aert trudens/ meyndt gericht te sijn inde voirg(eruerde) goede dat hij dat vervolgen mach mette(n)/ rechte cor(am) jacobo pynnoc et joh(anne) pake(n) burgim(a)g(ist)ris et q(uam)plu(r)ib(us) aliis in/ pleno consilio ja(nuarii) xiii