Cond zij allen lieden dat jan van udekem soen wilen jans van/ udekem voerspreken in jeg(enwoirdicheyt) d(er) scepen(en) van loeven(en) gestaen heeft/ verhuert en(de) bekend dat hij verhuert heeft gheerde van thienen/ geheten hudsge soen jans van thienen de stove met huysen hoven/ en(de) ande(re)n hoe(re)n toebehoerten gelegen te loeven opte halfstrate gelijc/ jan wilen parijs die ald(aer) te houden plach en(de) met derthien/ bedden d(aer) inne staende met hoe(re)n toebehoerten koetsen ende/ sargien Te houden te hebben en(de) te gebruycken van en sat sondage/ lestleden enen t(er)mijn tot des [yersten] sondaighs na halfmerte dat wesen/ sal int jair xiiii[c] en(de) ene(n)tsestich te weten elcke weeke/ dae(re)nbynne(n) voer en(de) om thien stuvers d(er) mu(n)ten sh(er)togen va(n)/ bourg(oignen) en(de) van brabant goet en(de) ghinghe altoes des sat(er)daigs/ te betalen en(de) ten huyse svoirs(creven) jans zo verre hij en(de) wa(n)neer/ hij by(n)nen loeve(n) wonechtich es te leve(re)n alle weeken den/ voirs(creven) t(er)mijn due(re)nde en(de) telken t(er)mijne alse v(er)volghde/ schout Met vorwerden dat de voirs(creven) gheerd houden sal/ op zinen last de voirs(creven) stove bynnen van kakelen gelasen/ vynste(re)n plancken bancken en(de) beide dueren int stove staende/ den voirs(creven) t(er)mijn langh en(de) die also goet laten te zinen af/ sceiden als hij die vynd tsijnen aencomen en(de) de voirs(creven)/ derthien bedden met hoe(re)n to voirs(creven) toebehoerten tsamen/ met den ketele die nu getaxeert zijn weert zijnde seventhien/ grijpen xl placken voe(r) elke grijpe sal de voirs(creven) gheerd/ also goet moeten laten te zinen afsceiden ter taxacien/ vanden schatters van loeven en(de) of hij die arger liete dat/ sal hij den voirs(creven) ja(n)ne oprichten en(de) waert dat hijse/ beter liete dat sal de voirs(creven) ja(n) hem oprichten altoes/ ter taxacien vanden voirs(creven) schatters It(em) sal de voirs(creven) jan/ de huyse van wande en(de) dake [en(de)] sulders houden sal op/ zinen cost wel en(de) loflic It(em) sal de voirs(creven) gheerd gehoude(n)/ zijn te bringen en(de) te houden ind(er) voirs(creven) stove(n) den voirs(creven)/ t(er)mijn langh vijf bedden sonder de bedden voirscr(even) It(em) sal/ de voirs(creven) gheerd op dat hem gelieft moegen scheiden vand(er)/ voirs(creven) stoven van halfmer des sat(er)daighs na halfm(er)te/ dat zijn sal int jair achten(de)vijftich naestcomen(de) by also/ dat hijt den voirs(creven) ja(n)ne een half jair te voe(re)n kundicht/ mair hij en sal de voirs(creven) stove nyeman(ne) and(er)s moegen/ v(er)hue(re)n noch laten houden so bynne(n) den voirs(creven) t(er)mijne/ sonder des voirs(creven) jans consent It(em) sal de voirs(creven) jan of een/ van zinen huysgesinde allen weeken inde voirs(creven) stove moegen/staen gaen of te xiiii nachten twee van zine(n) huysgesinde/ sond(er) yet te gheven It(em) sal de voirs(creven) gheerd den voirs(creven)/ ja(n)ne gheven telken vand(en) vier hoeghtiden den voirs(creven) t(er)mijn/ due(re)nde een quaert landwijns En(de) alle dese vorw(er)den etc(etera)/ samps zande au(gusti) ix sdijsd(aegs)